Njord Freediver jobbar for å gjere fridykking til ein allmenn folkeaktivitet på Søre Sunnmøre. Basert i ein region med havet som næraste nabo er vår visjon å gjere utforsking under vassoverflata tilgjengeleg for alle - gjennom menneskemøte, interessedyrking, turar, trening, felles ressursar, utstyr og kunnskap.

Uansett utgangspunkt, nybegynnar eller erfaren, er Njord Freediver eit dykkarfelleskap for deg. Vi femnar om eit breitt interessefelt der ingen undervasshobby er for smal.

Havet er ein del av folkesjela for oss som lever langs kysten. Saman ønskjer vi å kome i kontakt med denne delen av oss, på ein trygg og inkluderande måte - som gjestar i ei verd, større og mystisk enn den vi til dagleg utforskar på land.

Kvifor støtte Njord Freediver?

Å drive med fridykking er i og for seg ein nokså rimeleg hobby, men inngangssummen kan likevel bli litt stor for mange - spesielt om du er usikker på om hobbyen er noko for deg. Vi i Njord Freediver håpar å kunne gjere hobbyen lettare tilgjengeleg for folk gjennom å:

1. Tilby utlån av utstyr og rettleiing til dei som ønskjer å prøve fridykking eller snorkling.
2. Tilby eit trygt miljø av fridykkarar å dykke saman med.
3. Invitere tilreisande og fastbuande med på turar og treningar.
4. Gjere det mogleg for folk å ta med vennar eller familie på fridykker/snorkel-eventyr.

For å kunne tilby dette trenger vi startkapital til å gjere nødvendige innkjøp av utstyr. Vi er allereie ei aktiv fridykkargruppe, men ønskjer at fleire skal få vere med.

Som ein del av Herøy Dykkarklubb har Njord Freediver base i klubbhuset deira på Jensholmen i Herøy.

Fridykkerutstyr som bli kjøpt inn skal bli kontrollert, halde ved like og administrert gjennom frivillig dugnadsarbeid i Njord Freediver.

Utstyr vi ønskjer å kjøpe inn inkluderer:

Heilårsvåtdrakter, hanskar, våtdraktsokkar, dykkarmasker, snorklar, blybelte, sikkerheitsbøyer og symjeføter.

Målet er at utstyrspakkane skal omfatte forskjellige storleikar - både for han og ho. Omfanget og breidda av utstyrsparken er likevel avhenging av kor mykkje støtte vi får.

Kort om fridykking:

Å fridykke er kunsten å dykke med lungene som den einaste luftreserve. Over dei siste 20 åra har fridykking blitt ein folkesport i Noreg. Utstyret er lett og rimeleg, og ein kan faktisk vere timesvis i sjøen året rundt - utan å fryse!

Fridykking kan for mange vere ei fin pustepause frå kvardagen, samstundes kan det by på intense naturopplevingar, mosjon og glede.

Vi i Njord Freediver er optekne av at folk skal kunne delta på sine eigne premiss - utifrå eigne evner og erfaring. Du held pusten så lenge du vil og gradvis blir det lettare. Vil du berre snorkle på overflata, observere og flyte i takt med bølgene er det også ein fin måte praktisere hobbyen på. Små dykk eller snorkling kan bli til lengre turar og djupare djupner etterkvart som du blir trygg i vatnet.